1980 جىلى اقمولا وبلىسى, ساندىقتاۋ اۋدانىنىڭ شاڭتوبە اۋىلىندا دۇنيەگە كەلگەن نۇرجان 9 جاسىندا بوكس ۇيىرمەسىنىڭ تابالدىرىعىنان اتتادى. جەرگىلىكتى باپكەرلەر ۆلاديمير كاماشوۆ پەن گەننادي ساندالوۆتىڭ قول استىندا جاتتىعىپ, بۇل ونەردىڭ قىر-سىرىنا ابدەن قانىقتى. ارادا ەكى جىل وتكەندە ءوز قاتارلاستارى اراسىنداعى وبلىستىق جانە رەسپۋبليكالىق دودالاردا توپ جارا باستادى. بولايىن دەپ تۇرعان بالانى جازباي تانىعان جەكە باپكەرى ءارى ومىردەگى ۇستازى ۆلاديمير كاماشوۆ 1997 جىلى شاكىرتىن ەرتىپ, ەلورداعا قونىس اۋدارۋدى قۇپ كوردى. سەبەبى اۋىلدى جەرگە قاراعاندا ءىرى قالانىڭ مۇمكىندىگى مول عوي.
1998 جىلى شىمكەنتتە جاستار اراسىندا وتكەن قازاقستان بىرىنشىلىگىندە قارسىلاس شىداتپاعان نۇرجان كارىمجانوۆ 60 كەلى سالماق دارەجەسىنىڭ باس جۇلدەسىن ولجالادى. بۇل جەڭىس وعان كۇزدە بۋەنوس-ايرەستە جالاۋى جەلبىرەيتىن الەم بىرىنشىلىگىنە جول اشتى. ارگەنتينانىڭ استاناسىندا قانداسىمىز 57 كەلى سالماقتا سىنعا ءتۇسىپ, جارتى جولدا ءسۇرىندى. نەگىزى 1/8 فينالدا ول يسراەل پەرەستەن جەڭىلگەن جوق ەدى. بىراق تورەشىلەردىڭ ء«وز جوسپارى» بولدى. رينگ قوجايىنىنىڭ ىعىنا جىعىلعان ولار قازاقتىڭ ۇلىنا كوپە-كورىنەۋ قيانات جاسادى. ناتيجەسىندە جەرگىلىكتى بىلعارى قولعاپ شەبەرلەرى اراسىنان جالعىز پەرەس قانا جەڭىس تۇعىرىنىڭ ەڭ بيىك ساتىسىنا كوتەرىلدى.
1999 جىلى قازاقستان ۇلتتىق قۇراماسىن جاتتىقتىرعان تۇرسىنعالي ەدىلوۆ جاستاردى كوپتەپ تارتا باستادى. سولاردىڭ ءبىرى – نۇرجان كارىمجانوۆ ەدى. 60 كەلى سالماق دارەجەسىندە باق سىناپ جۇرگەن رۋسلان مۋسينوۆ, اسلان ەگۋباەۆ, ءومىرجان ءابدىراحمانوۆ جانە اسان سەكسەنباەۆ سىندى سايىپقىرانداردىڭ اراسىنان سۋىرىلىپ شىققان استانالىق ورەن حالىقارالىق دودالاردا ەل نامىسىن قورعاۋعا لايىق ەكەنىن تولىعىمەن دالەلدەدى.
– ۇلتتىق كوماندانىڭ قاتارىنا قابىلدانعانىمدا قۋانىشىمدا شەك بولعان جوق, – دەپ باستادى ءوز اڭگىمەسىن نۇرجان. – كۇنى كەشە عانا بولات ءجۇمادىلوۆ, ەرماحان ىبرايىموۆ, نۇرجان سمانوۆ سىندى ساڭلاقتاردىڭ ونەرىن تەك تەلەديداردان عانا تاماشالايتىن ەدىك. ال قازىر ولارمەن ءبىر زالدا جاتتىعىپ, ءبىر قوناقۇيدە تۇرىپ ارالاس-قۇرالاس بولۋ قۇرمەتىنە يە بولدىق. عانيبەت قوي! سونىمەن قاتار كوماندامىزدىڭ ارداگەرى سەرىك ومىربەكوۆتەن كوپ تاعىلىم الدىق. سەرىك اعا بىزدەن باقانداي 15 جاس ۇلكەن. كورگەنى, كوڭىلگە تۇيگەنى مول. ەڭبەكقورلىعى جاعىنان جالىنداپ تۇرعان جاستاردىڭ الدىن ەكى ورايدى. كەۋدەسىن ۇلتتىق نامىس كەرنەپ تۇر. قازاقتىڭ ناعىز نار تۇلعالى, ءور مىنەزدى ازاماتى. مىنە, وسىنداي جۇلدىزدارمەن بىرگە جاتتىعىپ, بىرگە جۇرگەننىڭ ارقاسىندا ءبىزدىڭ بۋىن تەز ەسەيدى.
1999 جىلى كارىمجانوۆ ازيا چەمپيوناتىندا ونەر كورسەتۋ قۇقىعىنا يە بولدى. تاشكەنتتە جالاۋى جەلبىرەگەن جارىستىڭ جالپى ەسەبىندە وزبەكستان قۇراماسىن قالاي دا ءبىرىنشى ورىنعا شىعارۋدى ماقسات تۇتقان قازىلار ءبىزدىڭ جىگىتتەرگە كوپ قيانات جاسادى. ونى جانكۇيەرلەر ۇمىتا قويعان جوق. ناتيجەسىندە 12 سالماق دارەجەسى بويىنشا وتكەن باسەكەدە وتانداستارىمىز 11 جۇلدە العانىمەن, سونىڭ ەكەۋى عانا التىن ەدى. تاشكەنت تورىندە اتاقتى ەرماحان ىبىرايىموۆ پەن دارىندى جاس نۇرجان كارىمجانوۆ قانا چەمپيوندىق اتاققا قول جەتكىزدى. وسى تابىسىنىڭ ارقاسىندا ايتۋلى بوكسشىعا سيدنەي وليمپياداسىنا جول اشىلدى.
عاسىرلار توعىسىندا الاۋى تۇتانعان وليمپيا ويىندارىندا نۇرجان ارمەنيا مەن اۋستراليا وكىلدەرىن ۇتقانىمەن, شيرەك فينالدا ۋكراينالىق اندرەي كوتەلنيككە ەسە جىبەردى. دەسەك تە تورتكۇل دۇنيەنىڭ ءار قيىرىنان كىل مىقتىلار جينالعان وسىنداي ءدۇبىرلى دودانىڭ بەل ورتاسىنا جەتۋ 20 جاستاعى جاس بوكسشى ءۇشىن جامان ناتيجە ەمەس ەدى.
2002 جىلى پۋساندا ۇيىمداستىرىلعان ازيا ويىندارىندا استانالىق ورەن الدىنا جان سالمادى. 63,5 كەلى سالماق دارەجەسىندە جۇدىرىقتاسقان كارىمجانوۆ جارتىلاي فينالدا سول كەزدەرى وزبەكستاننىڭ نامىسىن قورعاعان قازاق بوكسشىسى باقىت سارسەكباەۆقا سان سوقتىرسا, اقتىق ايقاستا پاكىستاندىق اسقار ءالي شاحتى شاڭ قاپتىردى.
2004 جىلى افينا وليمپياداسىندا نۇرجاننىڭ جۇلدە الاتىنىنا كۇماندانعاندار كەمدە-كەم ەدى. ولاي دەۋگە نەگىز, سوڭعى ءتورت جىل ارالىعىندا ول تالاي ۇلى دۇرمەكتەردە ىسىلىپ, بۇعاناسى ابدەن بەكىدى. ۇلكەن تاجىريبە مەكتەبىنەن ءوتتى. جوعارىدا اتالعان جارىستاردان بولەك, شىعىس ازيا, ورتالىق ازيا, افرو-ازيا ويىندارى, الەم كۋبوگى, كوپتەگەن حالىقارالىق تۋرنيرلەر جانە قازاقستان مەن كۋبا قۇرامالارى اراسىندا بىرنەشە مارتە ۇيىمداستىرىلعان ماتچتىق كەزدەسۋلەردە جەڭىمپاز دا اتاندى, جۇلدەلى ورىنداردى دا يەلەندى.
ەجەلگى ەللادا ەلىندەگى جارىستىڭ باستاپقى باسەكەلەرىندە مەكسيكا مەن ماروككو بوكسشىلارىنان باسىم تۇسكەن كارىمجانوۆ شيرەك فينالدا بولگاريالىق بوريس گەورگيەۆپەن شەبەرلىك بايقاستى. تارازى باسى ۇزاق تەڭسەلگەن جەكپە-جەك 20:18 ەسەبىمەن قارت قۇرلىق وكىلىنىڭ پايداسىنا شەشىلدى. وسى ەكى ۇپاي قازاق جىگىتىن وليمپيادا جۇلدەسىنەن ايىردى.
– سيدنەي مەن افينادا وتكەن وليمپيا ويىندارىندا قاتىسىپ, ەكى رەتىندە دە جەڭىس تۇعىرىنا سىنىق-سۇيەم قالعاندا ءسۇرىندىم. ارينە كەۋدەدە ءبىر وكىنىش قالدى. امال نەشىك, عالامدىق دودادا جەڭىس تۇعىرىنان قول بۇلعاۋ باقىتى ماعان بۇيىرمادى. الايدا سوعان كۇيىنىپ, ءوز-ءوزىڭدى ەزە بەرگەننەن ەشتەڭە وزگەرمەيدى. سودان كەيىن بىلعارى قولعابىمدى شەگەگە ءىلدىم. ول كەزدە جاسىم 25-كە دە تولعان جوق. ارينە ءالى دە بىرەر جىل جۇدىرىقتاسۋىما بولاتىن ەدى. بىراق افينا وليمپياداسىنان كەيىن بوكس-
كە دەگەن قۇشتارلىعىم كۇرت كەمىدى. بۇرىنعىداي جاتتىعۋ زالىنا كەلىپ, جانىمدى سالىپ دايارلانۋعا زاۋقىم سوقپادى. ونىڭ ۇستىنە وتباسىلى بولدىم, بالا-شاعا ءوسىپ كەلەدى. اكە-شەشەم قاراپايىم زەينەتكەرلەر. ولارعا قولعابىسىمدى تيگىزۋىم كەرەك. وسىنىڭ ءبارىن وي ەلەگىنەن وتكىزە كەلە, جوعارىداعىداي قادامعا باردىم, – دەپ كەيىپكەرىمىز اقتارىلا سويلەدى.
قىسقاشا بايانداساق, استانا تورىنەن ايبىندى ارەنالارعا اقجولتايلاپ شىققان بوكسشىنىڭ ءجۇرىپ وتكەن جولى وسىنداي. ەڭ باستىسى نۇرجان كارىمجانوۆتىڭ سالىپ كەتكەن سارا جولى وسى ءوڭىردىڭ جاس ورەندەرىنە جۇعىستى بولدى. كوپ ۇزاماي-اق ەلوردالىق بىلعارى قولعاپ شەبەرلەرى كوپتەگەن ءدۇبىرلى دودالاردا توپ جارىپ, حالىقتىڭ اق العىسى مەن ىستىق ىقىلاسىنا بولەندى.
عالىم سۇلەيمەن,
«ەگەمەن قازاقستان»
